Lög Lögréttu
I. kafli. Nafn og tilgangur
1. gr. Félagið heitir Lögrétta, félag laganema við Háskólann í Reykjavík. Heiti félagsins á ensku er Lögrétta, Reykjavik University Law Students’ Association. Aðsetur félagsins er við Háskólann í Reykjavík og varnarþing þess er í Reykjavík.
2. gr. Tilgangur félagsins er að:
a) Gæta hagsmuna og velferðar laganema við Háskólann í Reykjavík og efla tengsl þeirra á milli.
b) Taka þátt í samstarfi við aðila innan háskólasamfélagsins og aðra fræðimenn.
c) Stuðla að stöðugri framþróun lagadeildar Háskólans í Reykjavík og efla fræðistarf á sviði lögfræðinnar.
d) Stofna til virkrar umræðu um lögfræðileg málefni.
3. gr. Félagið skal leitast eftir því að ná tilgangi sínum með því að:
a) Skapa tengsl við félög lögfræðinga og laganema hér á landi sem og erlendis.
b) Efna til mannfagnaða í nafni félagsins.
c) Annast útgáfu tímarits Lögréttu þar sem birtar eru fræðigreinar um lögfræðileg málefni líðandi stundar.
d) Halda málþing um lögfræðileg málefni sem eru ofarlega á baugi hverju sinni.
e) Hafa starfandi hagsmunaráð laganema.
f) Bjóða almenningi lögfræðiráðgjöf að kostnaðarlausu í gegnum lögfræðiþjónustu Lögréttu.
4. gr. Starfstími Lögréttu og reikningsár er á milli aðalfunda.
II. kafli. Stjórn félagsins
5. gr. Stjórn félagsins skal skipuð sjö nemendum við lagadeild Háskólans í Reykjavík. Stjórn skal skipuð formanni, varaformanni, gjaldkera, útgáfustjóra Tímarits Lögréttu, formanni málfundafélags, formanni skemmtinefndar og markaðsstjóra.
6. gr. Stjórn Lögréttu stýrir málefnum félagsins með þeim takmörkunum sem lög þessi setja. Stjórnin tekur ákvarðanir um starfsemi félagsins og ber ábyrgð á fjárreiðum og skuldbindingum félagsins gagnvart þriðju aðilum.
7. gr. Formaður Lögréttu ritar firma félagsins. Formaður og gjaldkeri fara sameiginlega með prókuru félagsins.
8. gr. Formaður, í forföllum hans varaformaður, kemur fram fyrir hönd Lögréttu innan sem utan Háskólans í Reykjavík.
9. gr. Formaður, í forföllum hans varaformaður, stýrir fundum stjórnar. Í forföllum þeirra kýs stjórn fundarstjóra úr sínum hópi hverju sinni.
10. gr. Formaður, í forföllum hans varaformaður, situr sem fulltrúi laganema á deildarfundum lagadeildar.
11. gr. Varaformaður, í fjarveru hans útgáfustjóri tímaritsins, ritar fundargerðir stjórnarfunda. Varaformaður fer með umsjón aðsendra bréfa og skal vera tengiliður Lögréttu við önnur félög laganema, innlend sem erlend.
12. gr. Gjaldkeri ber ábyrgð á bókhaldi félagsins. Gjaldkeri fer jafnframt með yfirumsjón fjármála allra nefnda sem starfa á vegum Lögréttu. Gjaldkera ber að halda til haga stöðu styrkja og útgjalda í gegnum skólaárið og gera stjórn reglulega grein fyrir fjárhagslegri stöðu félagsins. Telji gjaldkeri að rekstur félagsins stefni í tap skal boða til fundar innan stjórnar hið fyrsta og tekin sameiginleg ákvörðun um aðgerðir.
13. gr. Reikningsár félagsins er á milli aðalfunda. Reikningum félagsins skal lokað 10 sólarhringum fyrir boðaðan aðalfund. Gjaldkeri skal tryggja að eigi lægri fjárhæð en 300.000 kr. sé á reikningi félagsins þegar reikningum þess skal lokað. Endurskoðendur félagsins skulu fá reikninga til endurskoðunar eigi síðar en fjórum sólarhringum fyrir aðalfund svo hægt sé að bera þá upp til samþykktar.
14. gr. Formaður málfundafélags ber ábyrgð á starfi Málfundafélags Lögréttu og tekur þátt í störfum stjórnar. Formanni málfundafélags er heimilt að skipa að hámarki sex meðlimi málfundafélags. Í málfundafélagi skulu sitja að hámarki sjö meðlimir, að formanni málfundafélags meðtöldum.
15. gr. Útgáfustjóri Tímarits Lögréttu ber ábyrgð á útgáfustarfsemi Lögréttu og tekur þátt í störfum stjórnar. Útgáfustjóra ber að halda úti vefsíðu tímaritsins, timaritlogrettu.is. Útgáfustjóra er heimilt að skipa að hámarki sex meðlimi ritnefndar. Í ritnefnd skulu sitja að hámarki sjö meðlimir, að útgáfustjóra meðtöldum.
16. gr. Formaður skemmtinefndar Lögréttu ber ábyrgð á skipulagningu viðburða félagsins, ásamt meðlimum skemmtinefndar, og tekur þátt í störfum stjórnar. Formanni skemmtinefndar er heimilt að skipa að hámarki sex meðlimi skemmtinefndar. Skemmtinefnd skal leitast eftir að skipa að minnsta kosti einn nýnema í nefndina í byrjun skólaárs. Í skemmtinefnd skulu sitja að hámarki sjö meðlimir, að formanni skemmtinefndar meðtöldum.
17. gr. Markaðsstjóri Lögréttu ber ábyrgð á allri kynningar- og markaðsstarfsemi félagsins. Markaðsstjóri skal vinna að því að auka sýnileika og styrkja ímynd félagsins og tryggja markvissa upplýsingagjöf til nemenda og annarra hagsmunaaðila. Markaðsstjóri fer jafnframt með umsjón og rekstur samfélagsmiðla félagsins og heimasíðu félagsins, www.logretta.is.
18. gr. Skipunartími stjórnar er á milli aðalfunda.
19. gr. Stjórn skal halda fundi eigi sjaldnar en einu sinni í mánuði. Formaður boðar til stjórnarfunda með tryggilegum hætti, skemmst einum degi fyrir fund. Fund skal og jafnan halda ef tveir eða fleiri stjórnarmeðlimir óska þess.
20. gr. Meirihluti atkvæða ræður á stjórnarfundi en falli atkvæði jafnt fer formaður með oddaatkvæði. Stjórn er ákvörðunarbær þegar að lágmarki fjórir stjórnarmenn sitja stjórnarfund.
21. gr. Stjórn félagsins skal leita leiða til fjármögnunar félagsins og efna til samstarfssamninga við styrktaraðila félagsins.
22. gr. Stjórn félagsins getur boðað til almenns félagsfundar til að ræða málefni Lögréttu við félagsmenn. Formaður Lögréttu setur fundinn og tilnefnir fundarstjóra til að stýra umræðum á fundinum. Stjórn er skylt að boða til almenns félagsfundar ef fimmtungur félagsmanna óskar þess með skriflegri beiðni til stjórnar félagsins. Félagsfundir skulu auglýstir tryggilega með tveggja daga fyrirvara hið skemmsta.
23. gr. Komi fram tillaga um vantraust á stjórn, einstaka stjórnarmeðlimi, nefnd, eða einstaka nefndarmann, eða framkvæmdastjóra eða meðstjórnanda Lögfræðiþjónustu Lögréttu skal stjórn boða til félagsfundar, með tryggilegum hætti, innan tveggja vikna frá móttöku tillögunnar.
Fundurinn er lögmætur ef einn þriðji hluti félagsmanna situr fundinn. Tillagan hlýtur samþykki ef þrír fjórðu hlutar fundarmanna greiða henni atkvæði. Hljóti tillaga samþykki telst viðkomandi stjórn, einstaka stjórnarmeðlimir, nefnd, eða einstaka nefndarmenn, hafa látið af embætti að fundinum loknum. Þá skal fundarstjóri boða til aukafundar, með tryggilegum hætti, innan tveggja vikna og eigi síðar en með viku fyrirvara. Á þeim fundi skal kjósa stjórn, einstaka stjórnarmeðlimi, nefnd, eða einstaka nefndarmenn, sem gegnir embætti til bráðabirgða, eða fram að næsta aðalfundi. Meirihluti atkvæða ræður kosningu. Framboð til stjórnar skal berast fundarstjóra fyrir upphaf fundar. Ákvæði þessarar greinar gilda einnig ef stjórn, nefnd eða aðilar í stjórn eða nefndum Lögréttu segja af sér.
24. gr. Allir þeir er gegna embætti í stjórn Lögréttu eða sitja í undirnefndum á vegum Lögréttu skulu sinna störfum sínum af kostgæfni, stunda heiðarleg vinnubrögð, vekja traust og virðingu út á við og leitast við að styrkja samstarf og samstöðu félagsmanna Lögréttu. Jafnframt er hverjum stjórnarmeðlimi skylt að skila greinargóðri skýrslu um störf sín fyrir félagið í lok hvers skipunarárs.
III. kafli. Aðalfundur og kosningar
25. gr. Aðalfundur hefur æðsta vald í málefnum félagsins. Aðalfund skal halda í maí ár hvert. Til fundarins skal boða með auglýsingu á tryggilegan hátt, með viku fyrirvara hið minnsta, og er hann þá lögmætur. Tillaga hlýtur samþykki ef einfaldur meirihluti fundarmanna greiðir henni atkvæði.
26. gr. Dagskrá aðalfundar skal vera eftirfarandi:
1. Stjórn félagsins gerir grein fyrir störfum sínum.
2. Stjórn félagsins leggur fram endurskoðaða reikninga félagsins.
3. Lagabreytingar.
4. Ný stjórn tekur við.
5. Kosið í embætti tveggja endurskoðenda og eins til vara.
6. Önnur mál.
27. gr. Kosningar í embætti Lögréttu skulu standa yfir í þrjá daga.
28. gr. Kosningarétt hafa allir félagsmenn. Kjörgengi hafa þeir félagsmenn sem greitt hafa félagsgjöld, nema annað leiði af lögum þessum. Kosningar til embætta Lögréttu skulu fara fram í maí ár hvert. Kosið er í embætti stjórnar Lögréttu og í embætti tveggja til fjögurra fulltrúa Lögréttu í framkvæmdaráði Lögfræðiþjónustu Lögréttu. Kosningar skulu auglýstar með tryggilegum hætti eigi síðar en tveimur vikum fyrir fyrsta boðaða kjördag og skal jafnframt auglýst eftir framboðum eigi síðar en tuttugu dögum fyrir fyrsta kjördag. Framboð skulu vera skrifleg og undirrituð, eða staðfest með rafrænum hætti í gegnum skólanetfang frambjóðanda. Framboðsfrestur rennur út tíu dögum fyrir fyrsta kjördag. Hver frambjóðandi má einungis bjóða sig fram í eitt embætti innan félagsins. Tilkynna skal niðurstöður kosninga eigi síðar en einni viku eftir að kosningum lýkur.
29. gr. Ef frambjóðandi er einn í framboði þarf hann tvo þriðju hluta greiddra atkvæða til að hljóta kosningu. Ef ekki hefur hlotist lögleg kosning í öll embætti, skal auglýsa eftir framboðum í laus embætti eigi síðar en tíu dögum eftir að niðurstöður kosninga liggja fyrir. Skal að öðru leyti fara um framkvæmd kosninganna eftir 28. gr.
30. gr. Hafi, eftir þessa síðari umferð kosninga, ekki hlotist lögleg kosning í öll embætti, skal nýkjörin stjórn skipa í laus embætti úr hópi félagsmanna sem hafa kjörgengi.
31. gr. Stjórn Lögréttu skipar kjörstjórn þremur aðilum úr hópi félagsmanna félagsins. Kjörstjórn skal skipuleggja kosningar. Meðlimir kjörstjórnar njóta ekki kjörgengis til stjórnarembætta.
32. gr. Kosningar skulu fara fram með rafrænum hætti og skal varaformaður í samráði við kjörstjórn sjá til þess að öllum kröfum um öryggi og skilvirkni sé fullnægt. Kosningar skulu vera leynilegar.
33. gr. Stjórn Lögréttu skal skipa þrjá aðila í kærunefnd vegna kosninga. Þeir sem sæti eiga í kærunefnd hafa fyrirgert rétti sínum til framboðs í viðkomandi kosningum.
34. gr. Kærur vegna kosninga skulu berast kærunefnd skriflega eigi síðar en þremur virkum dögum eftir að kosningar fóru fram. Kærunefnd skal kveða upp úrskurð um efni kæru eigi síðar en viku eftir að kærufrestur rann út. Úrskurðir kærunefndar eru endanlegir innan félagsins. Komist kærunefnd að því að kosning, í heild eða að hluta til, hafi ekki verið framkvæmd samkvæmt áður birtum reglum um framgang kosninga, skal kjörstjórn boða til kosninga á ný, í viðkomandi embætti. Kosningar skulu fara fram eigi síðar en tíu dögum eftir að kærunefnd skilar úrskurði og skal til þeirra boðað með viku fyrirvara hið skemmsta. Auglýsa skal eftir framboðum með viku fyrirvara hið skemmsta og rennur framboðsfrestur út sólarhring fyrir boðaðar kosningar. Að öðru leyti skulu sömu reglur gilda um framkvæmd aukakosninga og aðalkosninga sbr. 28. og 29 gr.
35. gr. Þrátt fyrir ákvæði 27.-34. gr. er stjórn Lögréttu heimilt að fela kjörstjórn Stúdentafélags Háskólans í Reykjavík umsjón kosninganna.
IV. kafli. Félagsmenn
36. gr. Allir þeir er stunda nám við lagadeild Háskólans í Reykjavík njóta aðildar að félaginu. Stjórn Lögréttu er þó heimilt að ákveða að þeir félagsmenn sem greiða félagsgjald njóti sérstakra fríðinda.
37. gr. Stjórn Lögréttu er heimilt að ákvarða upphæð félagsgjalda fyrir upphaf hvers skólaárs. Stjórn Lögréttu skal í byrjun skólaárs leggja fram að minnsta kosti 5% af fjármagni félagsins til Tímarits Lögréttu og málfundafélags, hvors um sig.
38. gr. Að frumkvæði fimmtíu félagsmanna er stjórn heimilt að víkja félagsmanni úr félaginu vegna ámælisverðrar háttsemi. Skila þarf skriflegri beiðni til stjórnar þar sem greint er frá ámælisverðri háttsemi félagsmannsins með málefnalegum og ítarlegum hætti.
39. gr. Stjórn félagsins er heimilt að útnefna heiðursfélaga og verndara Lögréttu meti hún tilefni til.
40. gr. Hver árgangur í lagadeildinni skal tilnefna hagsmunafulltrúa úr sínum röðum til þess að taka við athugasemdum frá nemendum lagadeildar. Stjórn Lögréttu skal sjá til þess að hagsmunafulltrúar séu kosnir eigi síðar en 1. október ár hvert. Formaður Lögréttu myndar hagsmunaráð laganema ásamt hagsmunafulltrúum frá hverju ári. Hagsmunaráð skal taka við ábendingum nemenda varðandi laganámið og kennsluhætti og koma þeim áleiðis til forseta lagadeildar.
V. kafli. Félagsdeildir o.fl.
41. gr. Útgáfustjóri Tímarits Lögréttu skal, ásamt ritnefnd og ritstjórn Tímaritsins, sem skipuð er af lagadeild Háskólans í Reykjavík, annast útgáfu tímaritsins.
42. gr. Hvert tölublað Tímarits Lögréttu skal innihalda eina ritrýnda fræðigrein um lögfræðileg málefni hið minnsta. Tímaritið skal einungis fjalla um málefni lögfræðilegs eðlis.
43. gr. Reikningum Tímarits Lögréttu og málfundafélags skal haldið sérgreindum. Skal þeim lokað eigi síður en tveimur sólarhringum fyrir aðalfund og skilað til endurskoðanda félagsins eigi síður en sólarhring fyrir aðalfund. Gjaldkeri skal sjá til þess að 50.000 kr. hið minnsta sé á reikningi Tímarits Lögréttu og málfundafélags, hvors um sig, þegar reikningum þeirra skal lokað. Gjaldkeri skal sjá til þess að fjármunum sé dreift jafnt milli undirnefnda þannig að nægilegt fjármagn sé til að sinna starfsemi nefndanna. Gjaldkeri félagsins hefur prókúru á reikning Tímarits Lögréttu og reikningi málfundafélagsins fyrir hönd útgáfustjóra og formanni málfundafélags.
44. gr. Hagnaði af útgáfustarfsemi skal ráðstafað í þágu Tímarits Lögréttu.
45. gr. Málfundafélag skal halda að lágmarki eitt málþing á hverri önn. Skal málfundafélagið skapa vettvang fyrir nemendur til að kynna sér lagaleg málefni sem eru ofarlega á baugi hverju sinni. Ef fjöldi nefndarmeðlima, að formanni meðtöldum, er slétt tala fer formaður með oddaatkvæði. Annars ræður meirihluti atkvæða.
46. gr. Skemmtinefnd skal skipuleggja skemmtanir fyrir félagsmenn í samstarfi við stjórn Lögréttu. Ef fjöldi nefndarmeðlima, að formanni meðtöldum, er slétt tala fer formaður með oddaatkvæði. Annars ræður meirihluti atkvæða.
47. gr. Markaðsstjóri Lögréttu sér um að flytja fréttir af starfi og viðburðum félagsins. Einnig sér markaðsstjóri til þess að viðburðir fái markvissa og tímanlega kynningu á aðgengilegan máta fyrir alla félagsmenn. Markaðsstjóri sér um samfélagsmiðla félagsins og gætir þess að allt efni sé í samræmi við gildi og markmið félagsins.
48. gr. Stjórn félagsins getur óskað eftir þátttöku félagsmanna í starfsemi í þágu þess og skipað frekari nefndir ef þess gerist þörf. Hyggist nýkjörin stjórn á næsta skólaári gera slíka nefnd varanlega skal bæta ákvæðum um hana í lög þessi með lagabreytingu skv. 50. gr.
49. gr. Lögrétta starfrækir Lögfræðiþjónustu Lögréttu í samstarfi við lagadeild Háskólans í Reykjavík. Störf við Lögfræðiþjónustuna skulu auglýst meðal laganema. Lögfræðiþjónusta Lögréttu skal skipuð tveimur til fjórum aðilum, að framkvæmdastjóra meðtöldum. Um framboð þeirra og kosningu ber að fara eftir 27.-35. gr. Framkvæmdastjóri skal við framboð vera að ljúka 6. önn til B.A. gráðu í lögfræði eða hafa lokið B.A. gráðu í lögfræði. Stjórn Lögréttu hefur umboð til að skipa framkvæmdastjóra Lögfræðiþjónustu Lögréttu ef ekkert framboð til stöðunnar berst.
VI. kafli. Breytingar á lögum og slit félags
50. gr. Lögum félagsins má breyta á aðalfundi eða sérstaklega boðuðum lagabreytingafundi boðuðum með að lágmarki tíu daga fyrirvara og þurfa tveir þriðju fundarmanna að greiða atkvæði með lagabreytingunni til að hún verði samþykkt. Stjórn er skylt að boða til lagabreytingarfundar ef fjórðungur félagsmanna óskar þess. Stjórn er heimilt að boða til slíks fundar að eigin frumkvæði. Allir félagsmenn eiga rétt á að koma með tillögur að lagabreytingum. Tillögum til lagabreytinga skal skilað til stjórnar eigi síðar en viku fyrir boðaðan fund. Í fundarboði skal þess getið sérstaklega að tillaga til lagabreytinga verði tekin til meðferðar á fundinum og skal efni hennar lýst. Heimilt er á aðalfundi eða lagabreytingarfundi að koma með frekari breytingartillögu við löglega fram komna breytingartillögu svo lengi sem tillagan breytir ekki efni upphaflegu breytingartillögunnar í megindráttum. Lagabreyting öðlast gildi frá þeim tíma sem hún er samþykkt á aðalfundi eða sérstökum lagabreytingarfundi.
51. gr. Ágreining um lög félagsins skal útkljá með gerðardómi. Stjórn félagsins skipar einn mann í gerðardóm, félagsfundur annan og forseti lagadeildar tilnefnir oddamann úr hópi kennara lagadeildar.
52. gr. Nú kemur fram tillaga um að félaginu skuli slitið. Skal hún þá sæta sömu meðferð og tillaga til lagabreytinga, skv. 50. gr.
53. gr. Eignir félagsins ganga til lagadeildar HR til varðveislu þegar félaginu er slitið þar til laganemar stofna annað félag í sama tilgangi sem telst arftaki Lögréttu og fær því eignir þess.
54. gr. Lög þessi skulu ætíð birt á heimasíðu Lögréttu, www.logretta.is, þar sem öllum félagsmönnum er heimilaður aðgangur.
VII. kafli. Gildistaka
55. gr. Lög þessi öðlast gildi við samþykkt þeirra á lagabreytingafundi Lögréttu 17. mars 2026.
