Lög Lögréttu
I. kafli Nafn og tilgangur
1. gr. Félagið heitir Lögrétta, félag laganema við Háskólann í Reykjavík. Á ensku skal félagið nefnast Lögrétta, Reykjavík University School of Law Student’s Organization. Aðsetur þess er í Háskólanum í Reykjavík og varnarþing er í Reykjavík.
2. gr. Tilgangur félagsins er 1. að gæta hagsmuna og velferðar laganema við Háskólann í Reykjavík; 2. að taka þátt í samvinnu akademískt menntaðra manna og stuðla að mótun lagadeildar Háskólans í Reykjavík.
3. gr. Tilgangi sínum skal félagið ná með því 1. að skapa tengsl við félög lögfræðinga og laganema hér á landi sem og erlendis; 2. að standa að útgáfu lögfræðiefnis; 3. að stofna til umræðu um lögfræðileg málefni; 4. að efna til mannfagnaða í nafni félagsins; 5. að þjálfa félaga sína til lögfræðilegra viðfangsefna, rökfimi og mælskulistar. 6. að hafa starfandi hagsmunaráð laganema.
4. gr. Starfstími Lögréttu og reikningsár er á milli aðalfunda.
II. kafli Stjórn félagsins
5. gr. Stjórn skal skipuð sjö félagsmönnum. Kosningar til stjórnar skal auglýsa á tryggilegan hátt 2 vikum, hið minnsta, fyrir boðaðan fyrsta kjördag. Stjórn skal skipuð formanni, varaformanni, gjaldkera, útgáfustjóra Tímarits Lögréttu, formanni málfundafélags, formanni skemmtinefndar og framkvæmdastjóra Lögfræðiþjónustu Lögréttu.
6. gr. Stjórn Lögréttu stýrir málefnum félagsins með þeim takmörkunum sem lög þessi setja. Hún tekur ákvarðanir um starfsemi félagsins og er ábyrg fyrir fjárreiðum og skuldbindingum gagnvart öðrum aðilum.
7. gr. Formaður Lögréttu ritar firma félagsins. Formaður og gjaldkeri rita prókúru félagsins.
8. gr. Formaður, í forföllum hans varaformaður, kemur fram fyrir hönd Lögréttu innan sem utan Háskólans í Reykjavík.
9. gr. Formaður, í fjarveru hans varaformaður, stjórnar fundum stjórnar. Í fjarveru þeirra stjórnar einhver stjórnarmanna fundi samkvæmt ákvörðun hverju sinni.
10. gr. Formaður situr sem fulltrúi laganema á deildarfundum lagadeildar.
11. gr. Varaformaður, í fjarveru hans útgáfustjóri tímaritsins, ritar fundargerðir stjórnarfunda. Varaformaður hefur umsjón með heimasíðu félagsins, www.logretta.is, svo og umsjá aðsendra bréfa. Varaformaður skal vera tengiliður Lögréttu við önnur félög laganema, innlend sem erlend.
12. gr. Gjaldkeri ber ábyrgð á bókhaldi félagsins. Gjaldkeri fer jafnframt með yfirumsjón yfir fjármálum allra nefnda og undirfélaga sem starfa á vegum Lögréttu. Gjaldkeri undirbýr fjárhagsáætlun félagsins eitt ár fram í tímann og leggur hana fyrir stjórn til samþykktar fyrir septemberlok ár hvert. Verði gjaldkera ljóst að tap sé á rekstri félagsins skal boða til fundar innan stjórnar hið fyrsta og tekin sameiginleg ákvörðun um aðgerðir.
13. gr. Reikningsár félagsins er á milli aðalfunda. Reikningum félagsins skal lokað 10 sólarhringum fyrir boðaðan aðalfund. Endurskoðendur félagsins skulu fá reikninga til endurskoðunar eigi síðar en 4 sólarhringum fyrir aðalfund svo hægt sé að bera þá upp til samþykktar.
14. gr. Formaður málfundafélags ber ábyrgð á starfi Málfundafélags Lögréttu og tekur þátt í störfum stjórnar.
15. gr. Formaður ritnefndar ber ábyrgð á útgáfustarfsemi Lögréttu og tekur þátt í störfum stjórnar.
16. gr. Skipunartími stjórnar er á milli aðalfunda.
17. gr. Stjórn skal halda fundi eigi sjaldnar en einu sinni í mánuði. Formaður boðar til stjórnarfunda. Stjórnarmeðlimir geta óskað þess að boðað verði til stjórnarfundar.
18. gr. Meirihluti atkvæða ræður á stjórnarfundi en falli atkvæði jafnt fer formaður með oddaatkvæði. Stjórn telst ályktunarbær, ef meirihluti stjórnarmeðlima situr fund.
19. gr. Stjórn félagsins skal leita leiða til fjármögnunar félagsins.
20. gr. Stjórn félagsins getur boðað til almenns félagsfundar til að ræða málefni Lögréttu við félagsmenn. Formaður Lögréttu opnar fundinn og tilnefnir fundarstjóra sem stýrir umræðum. Stjórn er skylt að boða til almenns félagsfundar ef fimmtungur félagsmanna óskar þess með skriflegri beiðni til stjórnar félagsins. Félagsfundir skulu auglýstir tryggilega með tveggja daga fyrirvara hið minnsta.
21. gr. Komi fram tillaga um vantraust á stjórn eða einstaka stjórnarmeðlimi, ritnefnd eða einstaka ritnefndarmeðlimi, málfundarfélag eða einstaka málfundarfélagsmeðlimi, skemmtinefnd eða einstaka skemmtinefndarmeðlimi, fréttaritara eða framkvæmdastjóra eða meðstjórnanda Lögfæðiþjónustu Lögréttu skal stjórn boða til félagsfundar, með tryggilegum hætti, innan tveggja vikna frá þeim tíma er tillagan barst til stjórnar. Fundurinn er lögmætur ef einn þriðji hluti félagsmanna mætir. Tillagan hlýtur samþykki ef þrír fjórðu hlutar fundarmanna greiða henni atkvæði. Hljóti tillaga samþykki telst viðkomandi stjórn, nefnd eða embættismaður hafa látið af embætti að fundinum loknum og skal fundarstjóri boða til aukafundar innan tveggja vikna, með viku fyrirvara hið minnsta, með tryggilegum hætti. Á þeim fundi skal kjósa stjórn eða embættismann, sem gegnir embætti fram að næsta aðalfundi. Meirihluti atkvæða ræður kosningu. Framboð til stjórnar skal berast fundarstjóra fyrir upphaf fundar. Ákvæði þessarar greinar gilda einnig, eftir því sem við á, ef embættismenn Lögréttu segja af sér. Stjórn eða einstakir stjórnarmeðlimir, ritnefnd eða einstakir ritnefndarmeðlimir, málfundafélag eða einstaklir málfundarfélagsmeðlimir, skemmtinefnd eða einstakir skemmtinefndarmeðlimir, fréttaritari eða framkvæmdastjóri eða meðstjórnendur Lögfræðiþjónustu Lögréttu skulu: Sinna störfum sínum af kostgæfni, stunda heiðarleg vinnubrögð, vekja traust og virðingu út á við og leitast við að styrkja samstarf og samstöðu félagsmanna Lögréttu. Jafnframt skal hver stjórnarmeðlimur skila greinagóðri skýrslu um störf sín fyrir félagið.
III. kafli Aðalfundur og kosningar
22. gr. Aðalfundur hefur æðsta vald í málefnum félagsins. Aðalfund skal halda í maí ár hvert. Til fundarins skal boða með auglýsingu á tryggilegan hátt, með viku fyrirvara hið minnsta, og er hann þá lögmætur. Tillaga hlýtur samþykki ef helmingur fundarmanna greiðir henni atkvæði.
23. gr. Mál þessi skulu tekin til meðferðar á aðalfundi: 1. Stjórn félagsins gerir grein fyrir störfum sínum. 2. Stjórn félagsins leggur fram endurskoðaða reikninga félagsins. 3. Lagabreytingar. 4. Ný stjórn tekur við. 5. Kosið í embætti tveggja endurskoðenda og eins til vara. 6. Önnur mál.
24. gr. Kosningar í embætti Lögréttu skulu standa yfir í þrjá daga.
25. gr. Kosningarétt hafa allir félagsmenn. Kjörgengi hafa allir þeir félagsmenn sem greitt hafa félagsgjöld, nema annað komi fram í lögum þessum. Framboð skulu vera skrifleg og undirrituð eða staðfest í gegnum skólanetfang frambjóðanda. Kosningar til embætta Lögréttu skal halda í mars ár hvert. Tilkynna skal niðurstöður kosninanna í síðasta lagi viku eftir að lokað hefur verið fyrir kosningar. Auglýsa skal eftir framboðum minnst 20 dögum fyrir fyrsta kjördag. Framboðsfrestur er 10 dagar fyrir fyrsta kjördag. Kosið er í embætti stjórnar, til ritnefndar og Málfundafélags Lögréttu ásamt skemmtinefnd Lögréttu. Að auki er kosið í embætti tveggja til fjögurra fulltrúa Lögréttu í framkvæmdaráði Lögfræðiþjónustu Lögréttu og embætti fréttaritara Lögréttu. Hver frambjóðandi má einungis bjóða sig fram í eitt embætti innan félagsins.
26. gr. Ef frambjóðandi er einn í framboði þarf hann 2/3 hluta greiddra atkvæða til að hljóta kosningu. Ef ekki hefur hlotist lögleg kosning í öll embætti, skal auglýsa eftir framboðum í laus embætti ekki síðar en 10 dögum eftir að niðurstöður kosninga liggja fyrir. Skal að öðru leyti fara um framkvæmd kosninganna eftir 26. gr. Hafi, eftir þessa síðari umferð kosninga, ekki hlotist lögleg kosning í öll embætti, skal nýkjörin stjórn skipa í laus embætti úr hópi félagsmanna sem hafa kjörgengi.
27. gr. Kjörstjórn skal skipuð þremur óháðum aðilum. Stjórn Lögréttu skal skipa kjörstjórn úr hópi félagsmanna. Kjörstjórn skal skipugleggja kosningar. Kjörstjórn nýtur ekki kjörgengis.
28. gr. Þrátt fyrir ákvæði 27., 30. og 31. gr. er stjórn Lögréttu heimilt að fela kjörstjórn Stúdentafélags Háskólans í Reykjavík stjórn kosninganna.
29. gr. Kosningar skulu fara fram með rafrænum hætti og skal varaformaður í samráði við kjörstjórn sjá til þess að öllum kröfum um öryggi og skilvirkni sé fullnægt. Kosningar skulu vera leynilegar.
30. gr. Stjórn Lögréttu skal skipa þrjá aðila í kærunefnd vegna kosninga. Þeir sem sæti eiga í kærunefnd hafa fyrirgert rétti sínum til framboðs í viðkomandi kosningum.
31. gr. Kærur vegna kosninga skulu berast kærunefnd skriflega eigi síðar en þremur virkum dögum eftir að kosningar fóru fram. Kærunefnd skal kveða upp úrskurð um efni kæru eigi síðar en viku eftir að kærufrestur rann út. Kærunefnd hefur endanlegt úrskurðarvald um efni kæru. Komist kærunefnd að því að kosning, í heild eða að hluta til, hafi ekki verið framkvæmd samkvæmt áður birtum reglum um framgang kosninga, skal kjörstjórn boða til kosninga á ný, í viðkomandi embætti. Kosningar skulu fara fram eigi síðar en tíu dögum eftir að kærunefnd skilar úrskurði og skal til þeirra boðað með viku fyrirvara. Auglýsa skal eftir framboðum með viku fyrirvara og rennur framboðsfrestur út sólahring fyrir boðaðar kosningar. Að öðru leyti skulu sömu reglur gilda um framkvæmd aukakosninga og aðalkosninga sbr. 29. gr.
IV. kafli Félagsmenn
32. gr. Allir þeir er stunda nám við lagadeild Háskólans í Reykjavík njóta aðildar að félaginu.
33. gr. Stjórn Lögréttu er heimilt að ákvarða félagsgjöld. Þá er stjórn heimilt að veita þeim sem greiða félagsgjöld fríðindi umfram aðra. Meðal þeirra fríðinda skal vera áskrift að Tímariti Lögréttu. Stjórn Lögréttu skal á hverju ári leggja fram að minnsta kosti 10% af félagsgjöldum sínum til Tímarits Lögréttu.
34. gr. Stjórn félagsins, að frumkvæði 50 félagsmanna, er heimilt að víkja félagsmanni úr félaginu vegna ámælisverðrar háttsemi. Skila þarf skriflegri beiðni til stjórnar þar sem ámælisverð háttsemin er rökstudd á ítarlegan hátt.
35. gr. Stjórn félagsins er heimilt að útnefna heiðursfélaga og verndara Lögréttu meti hún tilefni til.
36. gr. Hver árgangur í lagadeildinni skal tilnefna trúnaðarmann úr sínum röðum til þess að taka við athugasemdum frá nemendum lagadeildar. Stjórn Lögréttu skal sjá til þess að trúnaðarmenn séu kosnir eigi síðar en 1. október ár hvert. Formaður Lögréttu myndar hagsmunaráð laganema ásamt trúnaðarmönnum. Hagsmunaráð skal marka stefnu Lögréttu í málefnum sem varða laganámið almennt og kennsluhætti.
V. kafli Félagsdeildir
37. gr. Útgáfustjóri Tímarits Lögréttu skal, ásamt ritstjórn Tímaritsins, sem skipuð er af lagadeild Háskólans í Reykjavík, annast útgáfu tímaritsins.
38. gr. Í hverju tölublaði af Tímariti Lögréttu skal birta hið minnsta eina ritrýnda fræðigrein um lögfræðileg málefni. Takmarka skal útgáfu tímaritsins við lögfræðileg efni svo og málefni tengd þeim.
39. gr. Reikningum Tímarits Lögréttu skal haldið sérgreindum. Skal þeim lokað 2 sólarhringum fyrir aðalfund og skilað til endurskoðanda félagsins sólarhring fyrir aðalfund. Útgáfaustjóri hefur prókúru á reikningi Tímarits Lögréttu.
40. gr. Hagnaði af útgáfustarfsemi skal ráðstafað í þágu Lögréttu og til Menningarsjóðs Lögréttu, sbr. 47. gr.
41. gr. Málfundafélag Lögréttu skal skipað fjórum aðilum, sem kosnir skulu listakosningu, og skal tilgreint á framboðslista hver býður sig fram til formanns þess. Hlutverk félagsins er að ná fram markmiðum 3. og 5. tl. 3. gr. Stjórn málfundafélagsins skal heimilt að efna til kosningar á meðal nýnema um fulltrúa þeirra til setu í málfundafélaginu. Skal slík kosning fara fram eigi síðar en 1. október ár hvert. Formaður hefur oddaatkvæði í ákvarðanatöku stjórnar málfundafélags.
42. gr. Skemmtinefnd skal skipuleggja skemmtanir fyrir félagsmenn í samstarfi við stjórn Lögréttu. Skemmtinefnd Lögréttu skal skipuð fjórum til fimm aðilum, sem kosnir skulu listakosningu og skal tilgreint á framboðslista hver býður sig fram til formanns hennar. Hlutverk nefndarinnar er að ná fram markmiðum 4. tl. 3. gr. Ef nefndin er skipuð fjórum aðilum ræður meirihluti atkvæða en falli atkvæði jafnt fer formaður með oddaatkvæði. Ef nefndin er skipuð fimm aðilum ræður meirihluti atkvæða.
43. gr. Fréttaritari sér um að flytja fréttir af starfi Lögréttu eða öðrum málefnum sem tengjast félaginu. Útgáfa fréttaritara birtist laganemum á annaðhvort pappírs- eða rafrænu formi.
44. gr. Stjórn félagsins getur óskað eftir þátttöku félagsmanna í starfsemi í þágu þess og skipað nefndir ef þess gerist þörf.
45. gr. a Lögrétta sér til þess að starfrækt sé útskriftarráð hvert ár, sé áhugi til staðar meðal útskriftarnemenda. Útskriftarráð skal skipað þremur aðilum og þar af skal einn þeirra vera gjaldkeri ráðsins. Gjaldkeri hefur prókúru á reikningi útskriftarráðs, undir eftirliti gjaldkera Lögréttu, en félagið ber að öðru leyti ekki ábyrgð á starfsemi né skuldbindingum ráðsins.
VI. kafli Stofnanir Lögréttu
46. gr. Lögrétta starfrækir Lögfræðiþjónustu Lögréttu í samstarfi við lagadeild Háskólans í Reykjavík. Störf við Lögfræðiþjónustuna skulu auglýst meðal laganema. Lögfræðiþjónusta Lögréttu skal skipuð tveimur til fjórum aðilum, sem kosnir skulu listakosningu og skal tilgreint á framboðslista hver býður sig fram í embætti framkvæmdastjóra. Framkvæmdastjóri skal við framboð vera að ljúka 6. önn til B.A. gráðu í lögfræði eða hafa lokið B.A. gráðu í lögfræði. Framkvæmdastjóri Lögfræðiþjónustunnar situr í stjórn Lögréttu.
47. gr. Lögrétta starfrækir Menningarsjóð Lögréttu.
48. gr. Sjóðsstjórn er heimilt að ákveða í samþykktum sjóðsins að Lögrétta leggi fram allt að 7% af félagsgjöldum sínum í sjóðinn á ári hverju og allt að 15% hagnaðar hvers tölublaðs Tímarits Lögréttu.
VII. kafli Breytingar á lögum
49. gr. Lögum félagsins má breyta á aðalfundi eða sérstaklega boðuðum lagabreytingafundi boðuðum með 10 daga fyrirvara, hið minnsta, og þurfa 2/3 hlutar fundarmanna að greiða atkvæði með lagabreytingunni til að hún verði samþykkt. Stjórn er skylt að boða til lagabreytingarfundar ef 25% félagsmanna óskar þess. Stjórn er heimilt að boða til slíks fundar að eigin frumkvæði. Allir félagsmenn hafa rétt til að koma með tillögur að lagabreytingum. Tillögum til lagabreytinga skal skilað til stjórnar eigi síðar en 7 dögum fyrir boðaðan fund. Tillögur skulu auglýstar á tryggilegan hátt. Í fundarboði skal þess getið sérstaklega að tillaga til lagabreytinga verði tekin til meðferðar á fundinum og skal efni hennar lýst. Heimilt er á aðalfundi eða lagabreytingarfundi að koma með breytingartillögu við löglega fram komna breytingartillögu svo lengi sem tillaga fundarins breytir ekki efni upphaflegu breytingartillögunnar að upplagi. Lagabreyting öðlast gildi frá þeim tíma þegar hún er samþykkt á aðalfundi eða öðrum lagabreytingarfundi. Á lagabreytingafundi skal fylgja fundarsköpum.
50. gr. Ágreining um lög félagsins skal útkljá með gerðardómi. Stjórn félagsins skipar einn mann í gerðardóm, félagsfundur annan og forseti lagadeildar tilnefnir oddamann úr hópi kennara lagadeildar.
51. gr. Nú kemur fram tillaga um að félaginu skuli slitið. Skal hún þá sæta sömu meðferð og tillaga til lagabreytinga, skv. 49. gr.
52. gr. Eignir félagsins ganga til lagadeildar HR til varðveislu þegar félaginu er slitið þar til laganemar stofna annað félag í sama tilgangi sem telst arftaki Lögréttu og fær því eignir þess.
53. gr. Lög þessi skulu ætíð birt á heimasíðu Lögréttu, www.logretta.is, þar sem öllum félagsmönnum er heimilaður aðgangur.
54. gr. Lög þessi öðlast þegar gildi. Lög þessi voru samþykkt á Lagabreytingafundi Lögréttu 27. mars 2015.
